“Son bir neçə ildir ki, Novruz bayramı ilə Ramazan bayramı üst-üstə düşür. Bu isə insanların qidalanma rejimində bir çox problemlərə yol açır. Xüsusilə həzm sistemində problemi olan, immun sistemi zəif olan insanlarda qidalanma vərdişlərindəki pozulmalar sağlamlıqlarında ciddi fəsadlara yol aça bilər. Buna görə də Novruz bayramı ərəfəsində oruc tutan şəxslər balanslı qidalanmağa diqqət etməlidirlər. Çünki Novruz bayramına aid qidalar daha ağır kalorili, yağlı, şəkərli qidalardır və oruc tutan şəxslərin bu qidaları qəbul etməsi həzm sistemində ağırlaşmaya səbəb olacaq”.
Bu sözləri Patrulaz.az-a açıqlamasında Qida təhlükəsizliyi Hərəkatının rəhbəri, Sağlam qidalanma mütəxəssisi Məhsəti Hüseynova deyib.
O bildirib ki, oruc tutan şəxslər səhər yeməyində zülal tərkibli qidalara üstünlük verməlidirlər: “Eyni zamanda bir ovucu keçməyəcək formada çərəz qəbulu da gün ərzində enerjili olmağa kömək edəcək. İftar zamanı isə bayram süfrəsi olmasına baxmayaraq yeni hazırlanan şorbalar və bir növ isti yeməkdən istifadə etməlidirlər. Çox qızardılmış yağlı və ədviyyatlı qidalardan uzaq durmaq lazımdır. Çünki bir neçə saat ac qalan orqanizmdə sözügedən qidalar mədə şirəsinin balansını pozur və mədədə yanmaya da səbəb olur.
Novruz bayramında süfrədə müxtəlif şirniyyatlar olur və iftardan sonra bu qidaların qəbulu həzm sistemində problem yaradır və qanda şəkər səviyyəsinin sürətlə qalxmasına səbəb olur. Bu da sağlamlıq problemlərinə səbəb ola bilər. İftar zamanı miqdarı keçmədən qida qəbul etmək və yavaş-yavaş yemək lazımdır.
Eyni zamanda su qəbulu və gündəlik fiziki aktivliyi qorumaq da çox önəmlidir”.
- Abbaszadə Fidan
